(រាជធានីភ្នំពេញ)៖ នៅថ្ងៃចន្ទ ៣រោច ខែកត្តិក ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២២ ខែវិច្ឆិកា ឆ្នាំ២០២១
ឯកឧត្តម ឌុច ដារិន្ទ អគ្គនាយកនៃអគ្គនាយកដ្ឋាន កិច្ចការទូទៅនៃក្រសួងមុខងារសាធារណៈ បានដឹកនាំគណៈប្រតិភូក្រសួងមុខងារសាធារណៈកម្ពុជា ចូលរួម កិច្ចប្រជុំមន្រ្តីទំនាក់ទំនងលើវិស័យមុខងារសាធារណៈ (ACCSM Focal Points Meeting) នៃកិច្ចប្រជុំកិច្ចសហប្រតិបត្តិការអាស៊ានផ្នែកមុខងារសាធារណៈ លើកទី២១ (21st ACCSM) នៅសាលាភូមិន្ទរដ្ឋបាល តាមប្រព័ន្ធវីដេអូ ដែលរៀបចំដោយក្រសួងមហាផ្ទៃនៃប្រទេសវៀតណាម។
កិច្ចប្រជុំនេះ បានពិនិត្យ និងពិភាក្សាលើវឌ្ឍនភាពនៃការអនុវត្តផែនការការងារនៃកិច្ចសហប្រតិបត្តិការអាស៊ាន ស្តីពី កិច្ចការមុខងារសាធារណៈ និងមុខងារសាធារណៈបូកបី ឆ្នាំ២០២១-២០២៥ ដែលក្នុងនោះកម្ពុជា មានគម្រោងចំនួន ០៥ រួមមាន៖ (១) ទស្សនកិច្ចសិក្សា ស្តីពី ការផ្តល់សេវាសាធារណៈនៅប្រទេសចិន និងកូរ៉េខាងត្បូង (២) វេទិកាអាស៊ានបូកបី ស្តីពី ការផ្តល់សេវាសាធារណៈ (៣) សិក្ខាសាលា ស្តីពី ភាពជាអ្នកដឹកនាំសម្រាប់ការកែទម្រង់ (៤) សិក្ខាសាលា ស្តីពី ឌីជីថលនីយកម្មក្នុងរដ្ឋបាលសាធារណៈ និង(៥) ការអភិវឌ្ឍមជ្ឈមណ្ឌល អាស៊ានបូកបី ស្តីពី ការស្រាវជ្រាវ និងនវានុវត្តន៍។
កិច្ចប្រជុំបានពិភាក្សា និងផ្ដល់យោបល់លើសេចក្ដីព្រាងផែនការសកម្មភាពដើម្បីអនុវត្តសេចក្ដីប្រកាសអាស៊ាន ស្ដីពី ការជម្រុញសមត្ថភាពមុខងារសាធារណៈឆ្លើយតបទៅនឹងការប្រឈមថ្មី ដែលបានអនុម័តដោយប្រមុខមុខងារសាធារណៈអាស៊ាន។ ផែនការសកម្មភាពនេះ តម្រូវអោយប្រទេសសមាជិករៀបចំសកម្មភាព និងគម្រោងអនុវត្តទាំងកម្រិតជាតិ និងអាស៊ាន ដោយសហការជាមួយនឹងគ្រប់ភាគីពាក់ព័ន្ធតាមគ្រប់មធ្យោបាយ។
លើសពីនេះទៀត កិច្ចប្រជុំនេះក៏បានពិភាក្សាលើការពង្រឹង និងពង្រីកកិច្ចសហប្រតិបត្តិការជាមួយដៃគូ និងភាគីពាក់ព័ន្ធ រួមមាន ដៃគូសន្ទនា ដៃគូសន្ទនាតាមផ្នែក ដៃគូអភិវឌ្ឍ ទីភ្នាក់ងារអង្គការសហប្រជាជាតិ អង្គការអន្តរជាតិ អង្គការក្រៅរដ្ឋាភិបាល និងអង្គភាពពាក់ព័ន្ធអាស៊ាន ក្នុងការអនុវត្តឯកសារក្របខណ្ឌនៃភាពជាដៃគូយុទ្ធសាស្ត្រ នៃកិច្ចសហប្រតិបត្តិការអាស៊ានលើវិស័យមុខងារសាធារណៈ ដែលបានអនុម័តដោយប្រមុខមុខងារសាធារណៈអាស៊ាន ក្នុងការគាំទ្រនូវការកសាងមុខងារសាធារណៈអាស៊ាន និងចក្ខុវិស័យអាស៊ាន ព្រមទាំងបានពិភាក្សាលើឯកសារទស្សនទាននៃការធ្វើការសិក្សាស៊ីជម្រៅ យោងទៅតាមអនុសាសន៍ដែលបានលើកឡើងក្នុងឯកសារស្ដីពី ការធ្វើទំនើបកម្មមុខងារសាធារណៈក្នុងអាស៊ានឆ្ពោះទៅមុខងារសាធារណៈរួចរាល់សម្រាប់ថ្ងៃអនាគត ដែលបានអនុម័តដោយប្រមុខមុខងារសាធារណៈអាស៊ាន។ គម្រោងនេះគ្រោងធ្វើការពិភាក្សាលើប្រធានបទចំនួន៤ នៅឆ្នាំ២០២២ ៖ (១) អភិក្រមនៃរដ្ឋាភិបាលទាំងមូល (២) អភិបាលកិច្ច និងការគ្រប់គ្រងទិន្នន័យ (៣) មន្ត្រីរាជការរួចរាល់សម្រាប់ថ្ងៃអនាគត (៤) ពិពិធកម្ម និងបរិយាបន្ន ដើម្បីកសាងវិស័យមុខងារសាធារណៈអាស៊ានឱ្យបានរួចរាល់សម្រាប់ថ្ងៃអនាគត។
ប្រទេសសមាជិកទាំងអស់បានវាយតម្លៃខ្ពស់ និងមានមោទនភាពចំពោះកិច្ចខិតខំប្រឹងប្រែង សមិទ្ធផល និងវឌ្ឍនភាពនៃកិច្ចសហប្រតិបត្តិការរវាងប្រទេសសមាជិកអាស៊ាន លើវិស័យមុខងារសាធារណៈ ទោះជាស្ថិតក្នុងស្ថានភាពនៃការរីករាលដាលនៃជំងឺកូវីដ១៩ ក៏ដោយ។
កិច្ចប្រជុំនេះ បានបញ្ចប់ប្រកបដោយផ្លែផ្កា និងផលិតភាពខ្ពស់ ផ្អែកលើស្មារតីជាប្រពៃណីនៃកិច្ចសហប្រតិបត្តិការ និងសាមគ្គីភាពអាស៊ាន៕
