(រាជធានីភ្នំពេញ)៖ នារសៀលថ្ងៃចន្ទ ១១រោច ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី៨ ខែកុម្ភៈ ឆ្នាំ២០២១ នៅសាលាភូមិន្ទរដ្ឋបាល

ឯកឧត្ដម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ និងជានាយកសាលាភូមិន្ទរដ្ឋបាល តំណាងដ៏ខ្ពង់ខ្ពស់ ឯកឧត្ដម ព្រុំ សុខា រដ្ឋមន្ត្រីក្រសួងមុខងារសាធារណៈ បានអញ្ជើញជាអធិបតីដ៏ខ្ពង់ខ្ពស់ក្នុងពិធីសំណេះសំណាល និងដាក់ឱ្យដំណើរការវគ្គវិក្រឹត្យការមន្ត្រីជាន់ខ្ពស់ នៃវគ្គបណ្ដុះបណ្ដាលបន្តឆ្នាំ២០២១ នៃសាលាភូមិន្ទរដ្ឋបាល។

លោក ស្រ៊ាង ផានិត ប្រធាននាយកដ្ឋានបណ្ដុះបណ្ដាលបន្តនៃសាលាភូមិន្ទរដ្ឋបាល បានមានប្រសាសន៍នៅក្នុងរបាយការណ៍ថា សាលាភូមិន្ទរដ្ឋបាល បានធ្វើការជ្រើសរើសកម្មសិក្សាការីវគ្គវិក្រឹត្យការ សម្រាប់ឆ្នាំសិក្សា ឆ្នាំ២០២១ រួមមាន៖

ទី១.កម្មសិក្សាការីវគ្គវិក្រឹត្យការមន្ត្រីជាន់ខ្ពស់

ទី២.កម្មសិក្សាការីវគ្គវិក្រឹត្យការមន្ត្រីគ្រប់គ្រងរដ្ឋបាល

ទី៣.កម្មសិក្សាការីវគ្គវិក្រឹត្យការមន្ត្រីមធ្យម និង

ទី៤.កម្មសិក្សាការីវគ្គវិក្រឹត្យការមន្ត្រីក្រមការ

សរុបចំនួន ៩៤២ អង្គ/នាក់។