(រាជធានីភ្នំពេញ)៖ នៅព្រឹកថ្ងៃចន្ទ ៩រោច ខែចេត្រ ឆ្នាំខាល ចត្វាស័ក ព.ស.២៥៦៥ ត្រូវនឹងថ្ងៃទី២៥ ខែមេសា ឆ្នាំ២០២២
ឯកឧត្ដម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ និងជានាយកសាលាភូមិន្ទរដ្ឋបាល បានអញ្ជើញជាអធិបតីក្នុងកម្មវិធីសំណេះសំណាល ណែនាំពីការបណ្ដុះបណ្ដាល បទបញ្ជាផ្ទៃក្នុង និងរដ្ឋបាលសិក្សា សម្រាប់វគ្គវិក្រឹតការមន្ត្រីជាន់ខ្ពស់ ឆ្នាំ២០២២។
លោក ស្រ៊ាង ផានិត ប្រធាននាយកដ្ឋានបណ្ដុះបណ្ដាលបន្តនៃសាលាភូមិន្ទរដ្ឋបាល បានមានប្រសាសន៍នៅក្នុងរបាយការណ៍ថា៖
១. វគ្គវិក្រឹតការមន្រ្តីជាន់ខ្ពស់ ៖ មកពី ៣៦ក្រសួង ស្ថាប័ន / ថ្នាក់ក្រោមជាតិ ២ស្ថាប័ន សរុប ១៥៧អង្គនាក់/ ស្រី២១នាក់ ព្រះសង្ឃ ១០អង្គ
២. វគ្គវិក្រឹតការមន្រ្តីមធ្យម ៖ មកពី ៦២ក្រសួង ស្ថាប័ន / ថ្នាក់ក្រោមជាតិ ២៥ស្ថាប័ន សរុប ២៩៩អង្គនាក់/ ស្រី៧៦នាក់
៣. វគ្គវិក្រឹតការមន្រ្តីគ្រប់គ្រងរដ្ឋបាល ៖ មកពី ៤១ក្រសួង ស្ថាប័ន / ថ្នាក់ក្រោមជាតិ ១២ស្ថាប័ន សរុប ៩៥អង្គនាក់/ ស្រី២៣នាក់ ព្រះសង្ឃ ២អង្គ
៤. វគ្គវិក្រឹតការមន្រ្តីក្រមការ ៖ មកពី ១៦ក្រសួង ស្ថាប័ន / ថ្នាក់ក្រោមជាតិ ៨ស្ថាប័ន សរុប ២៧អង្គនាក់/ ស្រី១៦នាក់។
ក្នុងកម្មវិធីសំណេះសំណាលនេះ ឯកឧត្ដមនាយកសាលាភូមិន្ទរដ្ឋបាល បានសម្ដែងការកោតសសើរចំពោះកម្មសិក្សាការី ឆ្នាំ២០២២ ទាំងអស់ដែលអញ្ជើញមកទទួលការសិក្សានៅសាលាភូមិន្ទរដ្ឋបាល បន្ថែមពីនេះ ឯកឧត្ដមនាយក ក៏បានបញ្ជាក់យ៉ាងច្បាស់អំពីបាវចនាទាំងបួនរបស់សាលាភូមិន្ទរដ្ឋបាលគឺ៖
វិន័យ គុណភាព គុណធម៌ នវានុវត្តន៍ ការគោរពវិន័យក្នុងការទទួលយកនូវចំណេះដឹងបន្ថែមថ្មីៗ ការពង្រឹងស្មារតី សីលធម៌ មនសិការវិជ្ជាជីវៈ ការស្គាល់ខ្លួនឯង ភក្ដីភាព នវានុវត្តន៍ និងការទទួលខុសត្រូវ គឺជាគោលដៅសំខាន់នៃការបណ្ដុះបណ្ដាលនេះផងដែរ ដើម្បីរួមចំណែកពង្រឹង និងបង្កើនប្រសិទ្ធភាពសេវាសាធារណៈរបស់ប្រទេសកម្ពុជាឱ្យកាន់តែមានប្រសិទ្ធភាពខ្ពស់ជានិរន្តន៍ទៅមុខ។
ឯកឧត្ដមនាយកក៏បានជំរុញ និងលើកទឹកចិត្តដល់កម្មសិក្សាការី ឆ្នាំ២០២២ទាំងអស់ ត្រូវយកចិត្តទុកដាក់ឱ្យបានខ្ពស់ និងលើកកម្ពស់ដល់វិស័យសេវាសាធារណៈ ព្រមទាំងថែរក្សាសុខភាពផ្ទាល់ខ្លួន ទាំងសុខភាពផ្លូវកាយ និងសុខភាពផ្លូវចិត្ត ដើម្បីទទួលបាននូវជោគជ័យក្នុងការងារ និងជីវិតប្រចាំថ្ងៃថែមទៀតផង។
ជាកិច្ចបញ្ចប់នៃកម្មវិធីនេះ ឯកឧត្ដមរដ្ឋលេខាធិការប្រចាំការនៃក្រសួងមុខងារសាធារណៈ និងជានាយកសាលាភូមិន្ទរដ្ឋបាល បានប្រគេន និងចែកជូននូវម៉ាស់ក្រណាត់ដល់កម្មសិក្សាការីមន្ត្រីជាន់ខ្ពស់ ឆ្នាំ២០២២ ផងដែរ៕
